𝐌𝐈𝐍𝐈𝐒𝐓𝐑𝐔 𝐏𝐄𝐓𝐑Ó𝐋𝐄𝐔 𝐍𝐎 𝐌𝐈𝐍𝐄𝐑𝐀𝐈𝐒 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐃𝐈𝐀𝐋𝐎𝐆𝐔 𝐈𝐍𝐓𝐄𝐑𝐌𝐈𝐍𝐈𝐒𝐓É𝐑𝐈𝐀𝐋 𝐇𝐎 𝐊𝐎𝐌𝐔𝐍𝐈𝐃𝐀𝐃𝐄 𝐀𝐅𝐄𝐓𝐀𝐃𝐔 𝐇𝐀𝐌𝐔𝐓𝐔𝐊 𝟐𝟕 𝐏𝐀𝐑𝐒𝐄𝐋𝐀𝐒 𝐈𝐇𝐀 Á𝐑𝐄𝐀 𝐏𝐑𝐎𝐉𝐄𝐓𝐔 𝐑𝐄𝐅𝐈𝐍𝐀𝐑𝐈𝐀 𝐈𝐇𝐀 𝐁𝐄𝐓𝐀𝐍𝐎

Ministru Petróleu no Minerais, Dr. Victor da Conceição Soares, partisipa iha Dialogu Interministérial ho Komunidade afetadu hamutuk 27 parselas iha área Projetu Refinaria, Betano, Manufahi.

Dialogu Interministérial ho Komunidade afetadu hamutuk 27 parselas ne’e, organiza diretamente husi ekipa Timor Gap servisu hamutuk ho linhas Ministériais sira husi Ministériu Justisa ho ekipa Terras no Propriedades sira, no halao iha salaun Administrasaun Munisipiu Manufahi.

Durante halao dialogu refere, ekipa husi Servisu Nasionál Kadastrais ho Terras no Propriedades husi Ministériu Justisa, halao mos diseminasaun Lei relasiona ho Lei ba Rai no Propriedades, atu Komunidade afetadu hamutuk 27 parselas ba Projetu Refinaria iha Betano, ne’ebé mak sei halao husi Timor Gap ne’e, bele intende didiak liu tan Leis hirak ne’e, hodi bele hetan solusaun ne’ebé mak justu ba disputa refere.

Ministru Petróleu no Minerais, Dr. Victor da Conceição Soares liu husi diskursu ne’ebé mak hato’o iha abertura ba dialogu refere, akresenta katak, ” Agradese tebes ba ekipa linhas Ministérias sira husi Ministériu Justisa ho Terras no Propriedades, no Admimistrador Munisipiu Manufahi, Xefe Suku no Xefe Aldeia hodi servisu hamutuk ho ekipa tékniku sira husi Timor Gap, bele realiza ona dialogu ne’e, no liu husi dialogu refere hodi bele buka solusaun no justisa ne’ebé mak justu ba disputa entre komunidade afetadu husi Aldeais rua hamutuk 27 parselas ho estadu, tamba Ministériu Petróleu no Minerais hamutuk ho Instituisaun tutela Timor Gap, hanesan Utilizador ba terenu refere, hodi bele halo dezenvolvimentu liu husi Projetu Refinaria iha área Betano, tan ne’e mak Ministériu Justisa mak Lei no Konstituisaun fo kompetensia hodi administra, kontrola no jere rai no propriedades hotu mak sai hanesan patrimoniu estadu nian, hodi nune’e bele halo mediasaun hodi buka solusaun justu ba komunidade afetadu sira”.

Ministru Petróleu no Minerais mos sublinha liu tan katak, liu husi dialogu ne’e mos, bele rona mos perkupasaun komunidade afetadu sira, hodi labele kria injustisa ba komunidade afetadu sira, no solusaun ne’e tenki solusaun ida amigavel, pasífiku no justu, atu nune’e parte hotu bele satisfeitu ho prosesu iha dialogu ne’e, maibe prosesu refere tenki lao bazeia ba Leis ne’ebé mak vigora”.

Liu husi Dialogu Interministérial ho Komunidade afetadu hamutuk 27 parselas iha área Projetu Refinaria, Betano ne’e, konsege ona solusiona Komunidade sira husi 13 parselas mak afetadu ba Projetu refinaria ne’e, no sira mos agradese ba ekipa linhas Ministériais husi Ministériu Justisa ho Terras no Propriedades no ekipa tékniku Timor Gap, no ho disponibilidade tomak sei hamutuk asina akta hodi hein ba prosesu pagamentu, no ba komunidade nain husi 14 parselas mak seidauk hetan solusaun, sei hein konsultasaun no konfirmasaun ho parte legal no tékniku sira, antes Ministru Petróleu no Minerais hamutuk ho Ministru Justisa no Sekretáriu Estadu ba Terras no Propriedades sei foti desizaun polítika iha tempu mai, hodi solusiona komunidade nain ba 14 parselas ne’ebé mak sedauk hetan solusaun, hafoin ekipa tékniku sira sei tun ba halao tan verifikasaun detailhu iha parsela refere.

Dialogu refere partisipa mos husi Vise Ministru Justisa, Sekretáriu Estadu ba Terras no Propriedades, Vise Prezidente Timor Gap, Administrador Munisipiu Manufahi, Komandante PNTL Munisipiu Manufahi, Autoridades Lokais, Diretores no Xefias Linhas Ministériais hamutuk ho Komunidades Afetadus 27 Parselas.